O‘zbekiston Respublikasi Oliy Majlisi Qonunchilik palatasining Axborot va kommunikatsiya texnologiyalari masalalari qo‘mitasi o‘tkazgan seminar davlat hokimiyati organlari va jamoatchilik o‘rtasidagi aloqalarni rivojlantirishda matbuot xizmatlarining o‘rni va ahamiyatiga bag‘ishlandi. Uni mazkur qo‘mita raisi X.Do‘stmuhamedov boshqardi.
Seminarda Oliy Majlis Senati a’zolari, Qonunchilik palatasi deputatlari, jamoat tashkilotlari, tegishli vazirlik va idoralarning matbuot xizmatlari rahbarlari, ommaviy axborot vositalari vakillari qatnashdi.
Anjumanda kuchli davlatdan kuchli fuqarolik jamiyatiga o‘tish hamda hayotimizning barcha jabhalarini liberallashtirishda, axborot ochiqligi va erkinligi sharoitida matbuot xizmatlari tomonidan davlat hokimiyati organlari faoliyatini ommalashtirish, uning jamoatchilik bilan aloqalarini rivojlantirish masalalari, mavjud muammolar va ularning yechimlari haqida so‘z yuritildi.
Jamoatchilikni axborot bilan ta’minlashning huquqiy asoslari, parlament matbuot xizmati, Qonunchilik palatasining jamoatchilik bilan aloqalarini rivojlantirishda ommaviy axborot vositalarining o‘rni, ijroiya hokimiyat tizimida matbuot xizmati kabi mavzular yuzasidan fikr almashildi.
Man'ba - UzA
| 
