Suv va Iqtisodiyot

Xotin-qizlar huquqi doimiy himoyada

Otabek — Wed, 16 Sep 2009 10:29:49 GMT

Xotin-qizlar huquqi doimiy himoyada

O‘zA, Go‘zal Sattorova, 16.09.2009 13:14

“Kamolot” yoshlar ijtimoiy harakati markaziy kengashida O‘zbekiston xotin-qizlar qo‘mitasi, BMT Rivojlanish dasturining “O‘zbekistonda xotin-qizlarning imkoniyatlarini kengaytirish uchun huquqiy va tashkiliy salohiyatni rivojlantirish loyihasi” doirasida BMTning Xotin-qizlar huquqlari kamsitilishining barcha shakllariga barham berish bo‘yicha (CEDAW) qo‘mitasining tavsiyalarini amalga oshirish bo‘yicha O‘zbekistonda Milliy harakat rejasining bajarilishi yakunlariga bag‘ishlangan davra suhbati bo‘lib o‘tdi.

Milliy harakat rejasining bajarilishi, bu borada erishilgan yutuqlar, mavjud kamchiliklarni sarhisob qilish hamda istiqboldagi harakat rejasini belgilash maqsadida o‘tkazilgan mazkur tadbirda tegishli vazirlik, idora, jamoat va nodavlat tashkilotlari vakillari, ommaviy axborot vositalari xodimlari ishtirok etdi.

O‘zbekiston xotin-qizlar qo‘mitasi raisi o‘rinbosari G.Ma’rufova Prezidentimiz Islom Karimov rahnamoligida xotin-qizlarning jamiyatdagi nufuzini oshirish, qonuniy huquq va manfaatlarini ta’minlash, salomatligini mustahkamlash, intellektual va ma’naviy salohiyatini ro‘yobga chiqarish, oila, onalik va bolalikni himoya qilish bo‘yicha olib borilayotgan keng ko‘lamli ishlar yuksak samaralar berayotganini alohida ta’kidladi.

Prezidentimiz Islom Karimovning 2004 yil 25 mayda qabul qilingan “O‘zbekiston Xotin-qizlar qo‘mitasi faoliyatini qo‘llab-quvvatlash borasidagi qo‘shimcha chora-tadbirlar to‘g‘risida”gi farmoni hamda 2009 yil 13 aprelda qabul qilingan “Ona va bola salomatligini muhofaza qilish, sog‘lom avlodni shakllantirishga doir qo‘shimcha chora-tadbirlar to‘g‘risida”gi qarori bu boradagi ishlarni yanada yuqori pog‘onaga ko‘tarishda muhim dasturilamal bo‘lib xizmat qilayotir.

Bugungi ayollar nafaqat ijtimoiy-madaniy, balki iqtisodiyot, sanoat, qishloq xo‘jaligi, tadbirkorlik kabi sohalarda ham faol ish yuritmoqdalar. O‘zbekiston Respublikasi Konstitutsiyasi va qonunlarida ularning jamiyat hayotidagi mavqeini yanada yuksaltirish, huquq va manfaatlarini ta’minlash, munosib mehnat sharoiti yaratishga oid masalalar qat’iy mustahkamlab qo‘yilgan. Shuningdek, xotin-qizlar mehnatining kasanachilik, kichik biznes kabi yangi, samarali usullarini rivojlantirish, fermer xo‘jaliklarida ayollarni ish bilan ta’minlash, ularning huquqiy manfaatlarini, mehnat muhofazasini qat’iy himoyalashga alohida e’tibor qaratilmoqda.

Mamlakatimiz 1995 yilda Ayollar huquqlarini kamsitilishining barcha shakllariga barham berishga oid konvensiyani ratifikatsiya qilgan. Mazkur konvensiyani ratifikatsiya qilgan har bir davlat konvensiya qoidalarini hayotga tatbiq etish yuzasidan olib borilayotgan amaliy ishlari to‘g‘risida BMTning CEDAW qo‘mitasiga o‘zining davriy hisobotlarini taqdim etadi. O‘zbekiston ham mazkur konvensiyaning mamlakatimizdagi ijrosi bo‘yicha to‘rtta davriy ma’ruzani CEDAW qo‘mitasiga taqdim etgan. Jumladan, 2006 yilda mamlakatimizda olib borilgan ishlar to‘g‘risidagi ma’lumotlar taqdim etilgan. CEDAW qo‘mitasi tavsiyalarida mamlakatimizda xotin-qizlar manfaatlarini himoyalash va ta’minlash borasida amalga oshirilayotgan izchil ishlar yuqori baholangan.

Davra suhbatida yurtimizda bu boradagi ishlarni davlatimiz rahbarining farmon va qarorlari talablari darajasida amalga oshirish, mazkur jarayonda CEDAW qo‘mitasi tavsiyalarini inobatga olish bilan bog‘liq masalalar yuzasidan ma’ruzalar tinglandi va muhokama qilindi.

Yangi sport inshootlari

Otabek — Wed, 16 Sep 2009 10:28:41 GMT

Yangi sport inshootlari

O‘zA, G‘.Hasanov, 16.09.2009 13:10

Xalq ta’limi vazirligi huzuridagi Bolalar sportini rivojlantirish jamg‘armasi tomonidan Samarqand viloyatining shahar va qishloqlarida zamonaviy sport majmualari qurilib, bugungi kun talablari asosida jihozlanmoqda.

Pastdarg‘om tumani Do‘rmontepa qishlog‘idagi 77-umumta’lim maktabida zamonaviy sport zali foydalanishga topshirildi. Shuningdek, maktabga 12 million so‘mlik 36 turdagi sport jihozlari berildi. Mazkur inshoot qurilishiga jamg‘arma tomonidan 132 million so‘m sarflandi. Bu yerda o‘quvchilar sportning bir necha turi bilan shug‘ullanish imkoniga ega.

– Mamlakatimizda bolalar sportini rivojlantirish, yosh avlodning har tomonlama kamol topishiga qaratilayotgan e’tibor tufayli joriy yilning o‘zida viloyatimizda 21 sport zali qurilib, foydalanishga topshirildi, – deydi jamg‘armaning viloyat filiali ijrochi direktori Furqat Hojiyev. – Buning uchun jamg‘arma hisobidan 3,5 milliard so‘m mablag‘ ajratildi. Ayni paytda esa ushbu inshootlarga 252,2 million so‘mlik jihozlar tarqatilmoqda.

Yangi o‘quv yili boshida viloyatdagi umumta’lim maktablarida tahsil olayotgan kam ta’minlangan oilalar farzandlari uchun 155 million so‘mlikdan ziyod sport kiyim-kechaklari berildi.

Gulistonda qovun sayli

Otabek — Wed, 16 Sep 2009 10:27:45 GMT

Kuz – pishiqchilik, to‘kin-sochinlik pallasi. Ayni shu faslda qovun saylini o‘tkazish yaxshi an’anaga aylangan.

Guliston shahrida o‘tgan qovun saylida viloyatdagi fermer xo‘jaliklari vakillari, dehqon va sohibkorlar o‘n xildan ziyod qovun, tarvuz va oshqovoq navlari bilan ishtirok etdi. Ayniqsa, Mirzaobod, Sardoba, Sirdaryo tumanlari dehqonlari yetishtirgan ne’matlar ko‘pchilikning e’tiborini tortdi. Sayl ishtirokchilari tomonidan tilimi tilni yoradigan “Amiri”, “Sariq qirqma”, “Ko‘kcha”, “Bosvoldi”, “Qorako‘l”, “Doniyor”, “Asati”, “Obi novvot”, “Kampirchopon” navli qovunlar ayniqsa yuqori baholandi.

– Qovunning shifobaxshligi, turli dardlarga davo ekani azaldan ma’lum, – deydi mirzaobodlik mirishkor dehqon Ibodulla Qushbekov. – Biz ham bir necha yildan buyon xalqimizning dasturxoniga ana shunday sara poliz mahsulotlari yetkazib bermoqdamiz. Shuningdek, Mirzacho‘l qovunlarining yo‘qolib borayotgan navlarini saqlab qolish maqsadida ana shunday noyob qovunlarning urug‘ini yetishtirishni yo‘lga qo‘ydik.

Qovun saylida o‘z mahsulotlari bilan ishtirok etgan mirzaobodlik dehqonlar birinchi, Sirdaryo va Sardoba tumanlari dehqonlari ikkinchi, Guliston va Sayxunobod tumanlari mirishkorlari uchinchi o‘rinni egalladi. Mirzaobodlik tadbirkor Gavharoy Nishonovaning uy sharoitida qovun va tarvuzdan tayyorlagan povidlo, murabbo, sharbat, qovun asali, qovun qoqi, marmelad kabi shirinliklariga ham yuqori baho berildi.

G‘oliblarga viloyat hokimligining qimmatbaho esdalik sovg‘alari topshirildi.

Fermerlar uchun seminar

Otabek — Fri, 07 Aug 2009 09:37:32 GMT

Fermerlar uchun seminar

O‘zA, X.Mamatrayimov , 07.08.2009 14:30

Termiz shahrida O‘zbekiston fermer xo‘jaliklari uyushmasi Germaniya texnik hamkorlik jamiyati bilan birgalikda “Fermer xo‘jaliklarida baliqchilik hamda asalarichilik sohalarini yanada rivojlantirish” mavzuida mintaqaviy seminar o‘tkazdi. Unda Surxondaryo va Qashqadaryo viloyati fermerlari ishtirok etdi.

Prezidentimiz Islom Karimov tashabbusi bilan qishloq xo‘jaligida amalga oshirilayotgan izchil islohotlar fermerlik harakatini rivojlantirish, aholi farovonligini ta’minlashda muhim omil bo‘lmoqda. Asalarichilik va baliqchilik tarmoqlarida ham fermerlikning yo‘lga qo‘yilgani o‘z samarasini berayotir.

Surxondaryo va Qashqadaryo viloyatlarida baliqchilik hamda asalarichilikni rivojlantirish bo‘yicha qabul qilingan dastur doirasida muayyan ishlar olib borilmoqda. Ayni paytda Surxondaryo viloyatida 63 baliqchilik, 55 asalarichilik fermer xo‘jaligi faoliyat yuritmoqda. Qashqadaryo viloyatida esa 28 baliqchilik, 18 asalarichilik fermer xo‘jaligi aholiga xaridorgir mahsulotlar yetkazib berayotir.

Joriy yilning o‘tgan davrida Surxon vohasida baliqchilikni rivojlantirish uchun tijorat banklari tomonidan 250 million so‘mdan ortiq imtiyozli kredit ajratildi va shuning hisobiga baliqchilikka ixtisoslashgan 43 fermer xo‘jaligi tashkil etildi. Vohadagi sun’iy va tabiiy ko‘llarga 200 ming donadan ortiq baliq hamda 12,5 million dona baliq uvuldiriqlari tashlanib, parvarishlanmoqda. Muzrabot tumanidagi «Mehnat-rohat» xususiy korxonasi, Boysun tumanidagi “Qumsoy”, Jarqo‘rg‘on tumanidagi «Umid», Uzun tumanidagi “At-Termiziy”, “Abu-Xurayro”, “Azizbobo” fermer xo‘jaliklarida baliq yetishtirish borasida katta tajriba to‘plangan.

Qashqadaryo viloyatining Chiroqchi tumanidagi “Azimbobo”, Mirishkor tumanidagi “Azamat” va “Bobo Ravshan”, Qamashi tumanidagi “Abdurahmonov Boburjon” singari fermer xo‘jaliklari ham baliq yetishtirishda yaxshi ko‘rsatkichlarga erishmoqda.

– Avazko‘l qishlog‘idagi yuz gektar tabiiy ko‘lda baliq parvarishlayapmiz, – deydi Mirishkor tumanidagi “Azamat” fermer xo‘jaligi rahbari Abdurahmon Xudoyberdiyev. – Ayni paytda qayta ishlash korxonasi tashkil etish borasida ish olib bormoqdamiz.

Mintaqaviy seminarda baliqchilik va asalarichilikni rivojlantirish asoslari, sifatli mahsulot olish, yetishtirilgan mahsulotni qayta ishlash xususida so‘z yuritildi. Sohada uchrayotgan muammolar ham atroflicha tahlil qilinib, ularni bartaraf etish yuzasidan fikr-mulohazalar bildirildi.

– Tadbirda sohani yanada rivojlantirish uchun qator foydali takliflar bildirildi, – deydi Sariosiyo tumanidagi «Malika Ashurova» fermer xo‘jaligi rahbari Farruh Sohibov. – Xo‘jaligimizda 364 oila asalari parvarishlanmoqda. O‘tgan yili uch tonnaga yaqin shifobaxsh ne’mat tayyorlab, iste’molchilarga yetkazib berdik. Joriy yilda bundan ham ko‘proq asal yetishtirishni mo‘ljallayapmiz. Mazkur seminarda hamkasblarimiz bilan o‘zaro tajriba almashish imkoniga ega bo‘ldik.

Seminar ishtirokchilari Uzun tumanidagi “At-Termiziy” baliqchilik va “Mayusiy” asalarichilik fermer xo‘jaligining ish tajribalari bilan yaqindan tanishdilar.

Kursantlar o‘qishga shay

Otabek — Thu, 06 Aug 2009 05:49:22 GMT

Kursantlar o‘qishga shay

Markaziy harbiy okrugining Samarqand serjantlar tayyorlash maktabida yangi o‘quv yili boshlandi.

Shu munosabat bilan o‘tkazilgan tadbirda mamlakatimiz Qurolli Kuchlarida Prezidentimiz Islom Karimov rahnamoligida amalga oshirilayotgan keng ko‘lamli islohotlar samarasida ixcham va tez harakatlanadigan, zamonaviy qurol-aslaha va texnikaga ega professional armiya shakllantirilgani, yuqori malakali kadrlar tayyorlash va ularni ijtimoiy qo‘llab-quvvatlash borasida zarur chora-tadbirlar ko‘rilayotgani ta’kidlandi.

Serjantlar tayyorlash maktablarining tashkil etilishi Qurolli Kuchlarimizda shartnoma asosida xizmat qilayotgan yoshlarni yetuk mutaxassis qilib tayyorlashda muhim ahamiyat kasb etmoqda. 2001 yilda tashkil etilgan Samarqand serjantlar maktabida ham ayni paytda milliy armiyamiz uchun 8 yo‘nalish bo‘yicha mutaxassislar tayyorlanmoqda. Bu yerda tinglovchilarning jismoniy, jangovor va intellektual salohiyatini oshirish, zamonaviy texnologiyalardan xabardor bo‘lishi uchun barcha zarur sharoit yaratilgan.

- Harbiylikka qiziqishim katta, shu tufayli xizmatdan so‘ng, shartnoma asosida faoliyatimni davom ettirishga qaror qildim, – deydi kursant Usen Qudratov. – Serjantlar maktabida o‘qish orqali bugun orzuim amalga oshayotganidan juda xursandman.

Sog‘lom avlod tarbiyasi yo‘lida

Otabek — Thu, 06 Aug 2009 05:48:14 GMT

Sog‘lom avlod tarbiyasi yo‘lida

Farg‘ona shahrida “Sog‘lom ona – sog‘lom bola” mavzuini yoritishda ommaviy axborot vositalarining o‘rniga bag‘ishlangan anjuman bo‘lib o‘tdi.

Viloyat hokimligi, viloyat sog‘liqni saqlash boshqarmasi hamda O‘zbekiston Jurnalistlari ijodiy uyushmasi viloyat bo‘limi hamkorligida o‘tkazilgan tadbirda shahar va tuman hokimlari o‘rinbosarlari, xotin-qizlar qo‘mitalari raislari, tegishli boshqarma va idoralar, ommaviy axborot vositalari vakillari ishtirok etdi.

Mamlakatimizda Prezidentimiz rahnamoligida ona va bola salomatligini muhofaza qilish, sog‘lom avlodni shakllantirish masalalariga katta e’tibor qaratib kelinmoqda. Ayniqsa, reproduktiv salomatlikni ta’minlash, sog‘lom avlodni dunyoga keltirish uchun yetarli shart-sharoit yaratish borasida qabul qilingan qonun va qarorlar, ishlab chiqilgan dasturlar o‘z samarasini bermoqda.

Farg‘ona viloyatida ham ana shunday choralar natijasida bolalar va onalar o‘limi ancha kamaydi. O‘tgan yillar davomida 19 tug‘ruq muassasasi qayta ta’mirlandi. Viloyatdagi 32 salomatlik maskani YUNISEFning “Bolalarga do‘stona munosabatdagi shifoxona” sertifikatini qo‘lga kiritdi.

Prezidentimizning 2009 yil 13 aprelda qabul qilingan «Ona va bola salomatligini muhofaza qilish, sog‘lom avlodni shakllantirishga doir qo‘shimcha chora-tadbirlar to‘g‘risida”gi qarori bu boradagi ishlarning muhim bosqichini boshlab berdi.

Anjumanda sohada olib borilayotgan ishlar, ona va bola salomatligini asrash yo‘nalishi bo‘yicha ommaviy axborot vositalari xodimlari oldida turgan vazifalar xususida so‘z yuritildi.

O‘zbekiston Respublikasi Prezidentining qarori

Otabek — Thu, 06 Aug 2009 05:46:48 GMT

O‘zbekiston Respublikasi Prezidentining qarori

«Qishloq taraqqiyoti va farovonligi yili» Davlat dasturini ijro etish hamda qishloq aholi punktlarining bosh rejalari va arxitekturaviy rejalashtirishni tashkil etish loyihalariga muvofiq tasdiqlangan namunaviy loyihalar bo‘yicha yakka tartibdagi uy-joy qurilishi ko‘lamini kengaytirish asosida qishloq aholisining turar-joy sharoitlarini tubdan yaxshilash maqsadida:

1. Quyidagilar ma’lumot uchun qabul qilinsin:

Qoraqalpog‘iston Respublikasi Vazirlar Kengashi va viloyatlar hokimliklari tomonidan namunaviy loyihalar bo‘yicha uy-joy va ijtimoiy ahamiyatdagi obyektlar qurishning tajriba loyihalarini amalga oshirish uchun qishloq xo‘jaligi hamda o‘rmon fondi yerlari toifasiga kirmaydigan 42 ta yer massivi tanlab olindi;

2009-2010 yillarda 260,5 mlrd.so‘m, shu jumladan, 2009 yilda – 65,5 mlrd. so‘m miqdorida tasdiqlangan namunaviy loyihalar bo‘yicha qishloq aholi punktlarida yakka tartibdagi uy-joy qurilishini kreditlash manbalari aniqlab olindi.

2. «Qishloq qurilish bank» OATBning namunaviy loyihalar bo‘yicha uy-joy qurilishida yakka tartibda imorat quruvchilarga ko‘mak berish uchun respublikaning har bir mintaqasida o‘z filialiga ega «Qishloq qurilish invest» ixtisoslashtirilgan sho‘ba injiniring kompaniyasini tashkil etish to‘g‘risidagi taklifiga rozilik berilsin, uning zimmasiga quyidagi vazifalar yuklansin:

uy-joy bozorini marketing jihatdan o‘rganish va buning asosida qurish massivlarini, barpo etiladigan uy-joylar, ijtimoiy ahamiyatdagi obyektlar va muhandislik infratuzilmalari tarkibi hamda tuzilmasini tanlab olish bo‘yicha takliflar tayyorlash;

qishloq aholi punktlarida yakka tartibdagi yangi uy-joylar, shuningdek, ijtimoiy ahamiyatdagi obyektlar va muhandislik infratuzilmalarini «tayyor holda topshirish» shartlarida buyurtmachi funksiyalarini shartnoma asosida bajarish, jumladan, moliyalashni tashkil etish va qurilishning borishi ustidan texnik nazorat o‘rnatish;

aholi buyurtmanomalariga muvofiq uy-joylar, shuningdek, namunaviy loyihalar bo‘yicha «tayyor holda topshirish» shartlarida ijtimoiy ahamiyatdagi obyektlar va muhandislik infratuzilmasi obyektlarini qurish buyurtmalarini obyektlarni sifatli qurishni ta’minlab bera oladigan amaldagi va yangitdan tashkil etilayotgan pudratchi qurilish tashkilotlari o‘rtasida tanlov asosida joylashtirish;

keyinchalik «Qishloq qurilish bank» OATB tomonidan beriladigan imtiyozli kreditlar hisobidan uzil-kesil hisob-kitob qilingan holda namunaviy loyihalar bo‘yicha qurilgan yakka tartibdagi uylarni aholiga berish, shuningdek, muhandislik infratuzilmasi, ijtimoiy-madaniy va sanitariya-maishiy ahamiyatdagi obyektlarni ekspluatatsiya tashkilotlariga topshirish.

3. Quyidagi tartib o‘rnatilsinki, unga ko‘ra:

«Qishloq qurilish invest» injiniring kompaniyasi Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda uy-joy bozorini marketing jihatdan o‘rganish hamda aholining buyurtmanomalari asosida har yili 1 oktabrgacha mintaqalar doirasida quriladigan uy-joylar va ijtimoiy ahamiyatdagi obyektlar hajmi, tarkibi va tuzilmasi bo‘yicha takliflar tayyorlaydi;

Qoraqalpog‘iston Respublikasi Vazirlar Kengashi va viloyatlar hokimliklari tomonidan marketing jihatdan o‘rganish natijalari asosida 1 noyabrgacha bo‘lgan muddatda O‘zbekiston Respublikasi «Yergeodezkadastr» davlat qo‘mitasi va «Davarxitektqurilish» qo‘mitasi bilan kelishilgan holda qishloq xo‘jaligi hamda o‘rmon fondi yerlari toifasiga kirmaydigan yer massivlari tanlab olinadi hamda keyinchalik ular namunaviy loyihalar bo‘yicha yakka tartibdagi uy-joy va ijtimoiy ahamiyatdagi obyektlar qurish uchun «Qishloq qurilish invest» injiniring kompaniyasiga topshiriladi;

aniq yer uchastkasi va namunaviy loyihani tanlagan yakka tartibda imorat quruvchi “tayyor holda topshirish” sharti bilan turar-joy binosini qurishda buyurtmachi vazifasini bajarishi uchun “Qishloq qurilish invest” injiniring kompaniyasi bilan shartnoma tuzadi;

yakka tartibda imorat quruvchi bilan tuzilgan shartnoma asosida “Qishloq qurilish invest” injiniring kompaniyasi buyurtmachi sifatida “tayyor holda topshirish” sharti bilan namunaviy loyiha bo‘yicha yakka tartibdagi turar-joy binosi qurilishi yuzasidan barcha ishlar kompleksini tashkil etadi;

qurilish yakunlangandan keyin va yakka tartibda imorat quruvchi tomonidan dalolatnoma bo‘yicha turar-joy binosi qabul qilingandan so‘ng yakka tartibda imorat quruvchiga yer uchastkasini ajratish tuman (shahar) hokimining qarori bilan kimoshdi savdosi o‘tkazilmasdan umrbod meros qilib qoldiriladigan mulk tarzida rasmiylashtiriladi.

O‘zbekiston Respublikasi Vazirlar Mahkamasi (B.A.Xo‘jayev) «Qishloq qurilish bank» OATB, «Davarxitektqurilish» qo‘mitasi, boshqa manfaatdor vazirliklar va idoralar bilan birgalikda bir oy muddatda «Qishloq qurilish invest» injiniring kompaniyasi ishtirokida yakka tartibdagi uy-joy qurilishini amalga oshirish tartibi to‘g‘risidagi Nizomni ishlab chiqsin va tasdiqlasin.

4. «Qishloq qurilish bank» OATB:

O‘zbekiston Respublikasi «Davarxitektqurilish» qo‘mitasi bilan birgalikda ikki hafta muddatda ixtisoslashtirilgan «Qishloq qurilish invest» injiniring kompaniyasi ustavini ishlab chiqsin va tasdiqlasin;

bir oy muddatda «Qishloq qurilish invest» kompaniyasining zarur moddiy-texnika bazasi yaratilishini nazarda tutgan holda uning ustav kapitalini shakllantirsin, shuningdek, kompaniyaning malakali mutaxassislar bilan to‘ldirilishini ta’minlasin;

zarur hollarda, bank ustav jamg‘armasi mablag‘larini garov tariqasida qaytarish asosida ajratib berilishini nazarda tutgan holda “Qishloq qurilish invest” injiniring kompaniyasini ushbu jamg‘arma mablag‘i hisobidan aylanma mablag‘lar bilan ta’minlasin.

5. Belgilansinki:

yakka tartibdagi uy-joy qurilishi massivlarida ishlab chiqarish infratuzilmasi obyektlari qurilishi investorlar mablag‘lari va tijorat banklari kreditlari hisobidan amalga oshiriladi;

ijtimoiy infratuzilma obyektlari va tashqi muhandislik tarmoqlari qurilishi mahalliy budjet va homiylar mablag‘lari hisobidan moliyalashtiriladi.

6. Qoraqalpog‘iston Respublikasi Vazirlar Kengashi va viloyatlar hokimliklari:

ixtisoslashtirilgan «Qishloq qurilish invest» injiniring kompaniyasi va uning mintaqaviy filiallariga zarur infratuzilmani tashkil etish uchun shartnoma asosida yer uchastkalarini ajratish tarzida yordam ko‘rsatsin;

O‘zbekiston Respublikasi «Davarxitektqurilish» qo‘mitasi va “Yergeodezkadastr” davlat qo‘mitasi bilan kelishilgan holda, tasdiqlangan namunaviy loyihalar bo‘yicha yakka tartibdagi uy-joylar qurishga tasdiqlangan bosh reja asosida har yili qishloq xo‘jaligi va o‘rmon fondi yerlari toifasiga kirmaydigan yer uchastkalari ajratilishini ta’minlasin;

“Qishloq qurilish bank” OATB kreditlari hisobidan tasdiqlangan namunaviy loyihalar bo‘yicha yakka tartibdagi uy-joy qurilishi massivlarida barpo etiladigan muhandislik infratuzilmasi va ijtimoiy ahamiyatdagi obyektlarning ildam qurilishini ta’minlasin.

7. O‘zbekiston Respublikasi «Davarxitektqurilish» qo‘mitasi:

tanlanadigan yer massivlarining muhandislik tarmoqlari va transport kommunikatsiyalari bilan ta’minlanganligi, ishga tushiriladigan uy-joy hamda ijtimoiy-madaniy va sanitariya-maishiy obyektlarga bo‘lgan amaldagi talabning mavjudligi kompleks ekspertizadan o‘tkazilishini ta’minlasin;

yakka tartibdagi uy-joy qurilishida qurilish normalari va qoidalariga rioya etilishi ustidan qattiq nazoratni amalga oshirsin.

8. Ixtisoslashtirilgan “Qishloq qurilish invest” injiniring kompaniyasi 2014 yilning 1 yanvarigacha barcha turdagi soliq to‘lovlaridan hamda Respublika yo‘l jamg‘armasi va budjetdan tashqari Maktab ta’limi jamg‘armasiga majburiy to‘lovlardan ozod etilsin.

9. O‘zbekiston Respublikasi Prezidentining “Yosh oilalarni moddiy va ma’naviy qo‘llab-quvvatlashga doir qo‘shimcha chora-tadbirlar to‘g‘risida”gi 2007 yil 18 maydagi PF-3878-son Farmonining 4-bandi qishloq joylarda “Qishloq qurilish bank” OATB kreditlari hisobidan namunaviy loyihalar bo‘yicha yakka tartibda imorat quruvchilarga nisbatan tatbiq etilsin.

10. O‘zbekiston Respublikasi Moliya vazirligining Bosh nazorat-taftish boshqarmasi uy-joy va ijtimoiy infratuzilma obyektlari qurilishiga ajratilayotgan mablag‘lardan, shu jumladan, “Qishloq qurilish bank” OATBning imtiyozli kreditlaridan maqsadli foydalanilishi ustidan tizimli ravishda tekshiruvlar olib borsin.

11. O‘zbekiston Respublikasi «Davarxitektqurilish» qo‘mitasi Adliya vazirligi, boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

12. Mazkur qarorning ijrosini nazorat qilish O‘zbekiston Respublikasi Bosh vaziri SH.M.Mirziyoyev zimmasiga yuklansin.

O‘zbekiston Respublikasi
Prezidenti I.Karimov

Toshkent shahri,
2009 yil 3 avgust

Zamonaviy o‘quv maskani

Otabek — Fri, 16 Jan 2009 08:08:24 GMT

Zamonaviy o‘quv maskani

O‘zA, T.Beknazarov, 16.01.2009 11:35

Maktab ta’limini rivojlantirish Davlat umummilliy dasturiga muvofiq amalga oshirilayotgan keng ko‘lamli tadbirlar o‘z samarasini berayotir.

Mamlakatimizda moddiy-texnik bazasi mustahkam, yuqori pedagogik texnologiyalar asosida bilim berish uchun barcha qulayliklarga ega zamonaviy o‘quv maskanlari ko‘payib bormoqda. Jizzax shahridagi 1-umumta’lim maktabi ana shunday ta’lim muassasalaridan biridir.

Dastur asosida kapital ta’mirdan chiqarilib, ko‘rkam qiyofa kasb etgan maktab yangi jihozlar bilan ta’minlandi. Isitish va ichimlik suvi tarmog‘i yangilandi. Obodonlashtirish-ko‘kalamzorlashtirish ishlariga e’tibor kuchaydi. Hozir bu yerda 1 ming 600 dan ziyod o‘quvchi bilim olmoqda.

Mazkur maktab o‘quvchilari viloyatda o‘tkaziladigan turli intellektual musobaqalarda, ko‘rik-tanlovlarda peshqadamlik qilib keladi. Ayniqsa, ularning bilimni xolis baholash mezoni bo‘lgan fan olimpiadalarida yuqori o‘rinlarni egallashi so‘nggi yillarda an’anaga aylanib bormoqda. Yaqinda o‘quv predmetlarining 17 turi bo‘yicha o‘tkazilgan olimpiadaning shahar bosqichida maktab o‘quvchilari umumiy hisobda birinchi o‘rinni egalladi.

Maktabda sport zalining to‘liq ta’mirdan chiqarilib, qayta jihozlanishi o‘g‘il-qizlarni sportga keng jalb etish hamda jismoniy tarbiya darslari saviyasini oshirish imkonini berdi. Buning samarasini maktab o‘quvchilarining sport bo‘yicha shahar, viloyat va respublika musobaqalarida faol qatnashayotgani misolida ham ko‘rish mumkin. Xususan, “Shunqorlar”, “Yozgi ta’til-2008”, “Umid nihollari” musobaqalarining shahar va viloyat bosqichlarida ular shohsupaning yuqori pog‘onalaridan joy oldi. 9-sinf o‘quvchisi Hayitboy Ermatov boks bo‘yicha jahon chempionatiga yo‘llanmani qo‘lga kiritdi.

– O‘quv maskanimizda barcha fanlar davlat ta’lim standartlari asosida chuqur o‘qitilmoqda, – deydi maktab direktori G‘ulom Usmonov. – O‘qituvchilarimizning barchasi yuqori tajriba va kasbiy mahoratga ega. Zamonaviy o‘quv-laboratoriya qurilmalari, texnik vositalar, ko‘rgazmali qurollar bilan jihozlangan keng va yorug‘ sinfxonalarda darslar amaliy mashg‘ulotlar bilan birga olib borilayotgani o‘quvchilarning har bir fanni mukammal o‘zlashtirishiga imkon yaratmoqda.

Aholi farovonligi oshmoqda

Otabek — Fri, 16 Jan 2009 08:07:21 GMT

Aholi farovonligi oshmoqda

O‘zA, Yorqul Umar, 16.01.2009 11:24

Yangiqo‘rg‘on – Navbahor tumanidagi obod qishloqlardan. Bu yerda qariyb sakkiz ming aholi istiqomat qiladi. Qishloq ahlining o‘zaro hamjihatligi, tadbirkorlarning safi kengayib, bandlik darajasi oshib borayotgani bois bu yerda turmush sharoiti sezilarli darajada yaxshilanib bormoqda.

Mazkur qishloq fuqarolar yig‘inida zamonaviy maktab, ikkita bolalar bog‘chasi, ikkita shifoxona, o‘ttizga yaqin savdo shoxobchalari, ikkita tikuvchilik sexi va novvoyxona, fermerlarga yaqindan ko‘maklashuvchi muqobil mashina-traktor parki, xaridorlar va sotuvchilar uchun qulay sharoitga ega mo‘jaz dehqon bozori ishlab turibdi.

– Joriy yilda qishlog‘imizni yanada obodonlashtirish, ijtimoiy infratuzilmasini yaxshilash maqsadida amalga oshiradigan ishlarimiz ko‘p, – deydi Yangiqo‘rg‘on qishloq fuqarolar yig‘ini raisi Baxtiyor Farmonov. – Bolalarimiz bo‘sh paytlarini mazmunli o‘tkazishi uchun sport majmuasi barpo etish, qishloq vrachlik punkti qurishni rejalashtirdik. Shuningdek, 14 kilometrlik ichki yo‘llarni asfaltlash, ichimlik suvi ta’minotini yanada barqarorlashtirish uchun 24 kilometr masofaga yangi quvurlar tortish mo‘ljallanmoqda.

Ishlab chiqarish kengaymoqda

Otabek — Fri, 16 Jan 2009 08:05:54 GMT

O‘zA, D.Esonova, 16.01.2009 10:02

Baxt shahrida faoliyat yuritayotgan “Baxtmoyinvest” korxonasi Sirdaryo viloyati iqtisodiyotiga munosib hissa qo‘shib kelmoqda.

Xorijdan zamonaviy texnologik liniyalar keltirib o‘rnatilgach, bu yerda chigitdan sifatli o‘simlik moyi, shuningdek, kunjara, sheluxa singari chorva ozuqasi ishlab chiqarish imkoniyati kengaydi. Ayni paytda bir kecha-kunduzda yuz tonna chigitni qayta ishlash quvvatiga ega korxonada 90 nafarga yaqin yigit-qiz mehnat qilmoqda.

“Baxtmoyinvest” korxonasining ishlab chiqarish quvvatini oshirish, yangi liniyalarni ishga tushirish va qo‘shimcha ish o‘rinlari tashkil etish maqsadida rekonstruksiya va modernizatsiya ishlari davom etmoqda. Tayyor mahsulotlarni saqlash uchun qurilayotgan yangi omborxonada so‘nggi pardozlash ishlari bajarilayotir.