Kuchlar teng keldi
Yoshlar o‘rtasida futbol bo‘yicha Saudiya Arabistoni
yashil maydonlarida davom etayotgan Osiyo chempionatining “D”
guruhidagi ikkinchi tur uchrashuvida O‘zbekiston va Avstraliya terma
jamoalari o‘zaro kuch sinashdi.
Maydonda ustunlik qilgan futbolchilarimiz hisobni
o‘ttiz sakkizinchi daqiqada ochdi. Bu vaziyatda o‘z mahoratini namoyish
qilgan jamoamiz sardori Sherzod Karimov avstraliyaliklar posboni Endryu
Redmaynni ojiz qoldirdi – 1:0.
Hamyurtlarimiz uchrashuvning elliginchi daqiqasida
qo‘pol xatoga yo‘l qo‘ydi. Raqib futbolchisi Taj Maynnikon vaziyatdan
unumli foydalanib, Doniyor Usmonov darvozasini ishg‘ol qildi.
O‘yin 1:1 hisobidagi durang natija bilan yakunlandi
va har ikki jamoa chorak finalga chiqish uchun asosiy da’vogarligicha
qoldi.
Guruhdagi ikkinchi uchrashuvda Tailand yoshlar terma jamoasi vakillari iordaniyalik tengqurlarini 3:2 hisobida dog‘da qoldirdi.
Hal qiluvchi ― uchinchi tur bellashuvida
O‘zbekiston yoshlar terma jamoasi tailandlik futbolchilarga qarshi
maydonga tushadi. Ushbu bahsda futbolchilarimizni durang natija ham
qoniqtiradi. |