Bolalar uchun sayohatlar

O‘zA, Mariya Uxanova, 07.11.2008 09:21

“Sog‘lom avlod uchun” xalqaro xayriya jamg‘armasi tomonidan “Yoshlar yili” Davlat dasturi doirasida har tomonlama barkamol avlodni tarbiyalash, yoshlarni sog‘lomlashtirish, iste’dodini yuzaga chiqarish, Mehribonlik uylari tarbiyalanuvchilari va kam ta’minlangan oilalar farzandlarini qo‘llab-quvvatlashga yo‘naltirilgan tadbirlar o‘tkazilmoqda.

Yoshlarni Vatanga muhabbat, xalqimizning boy madaniy merosiga hurmat ruhida tarbiyalash va uni o‘rganishni targ‘ib qilish maqsadida tarixiy joylarga uyushtirilayotgan sayohatlar shular jumlasidandir. Bunday tadbirlarda hozirgacha 100 mingdan ziyod bolalar ishtirok etdi.

Kuzgi ta’til kunlarida Toshkent shahar hokimligi bilan hamkorlikda poytaxtimizdagi kam ta’minlangan oilalar farzandlari va Mehribonlik uylari tarbiyalanuvchilaridan 40 nafarining Samarqandga sayohati tashkil etildi. Bolalar qadimiy shaharning noyob me’moriy ansambllari bilan tanishdi hamda davlatimiz rahbari tashabbusi bilan shaharda istiqlol yillarida qad rostlagan muhtasham imoratlar, shohko‘chalar, sayilgohlar va bog‘larni tomosha qildi.

Jamg‘armaning hududiy bo‘limlari tomonidan ham bolalarga kuzgi ta’til kunlarini qiziqarli va mazmunli o‘tkazishda yordam berish uchun xayriya tadbirlari uyushtirilmoqda.