“Yoshlar yili” Davlat dasturining amalga oshirilishi natijasida
zamonaviy bilim va kasb-hunarlarni egallagan millionlab yoshlarimiz
hayotga katta umid va ishonch bilan kirib kelmoqda.
“Farzandlarimiz,
yoshlarimiz bizning nafaqat ishonchimiz va kelajagimiz, yoshlarimiz
bugungi va ertangi kunimizning hal qiluvchi kuchidir”. Prezidentimiz
Islom Karimov O‘zbekiston Respublikasi Konstitutsiyasi qabul
qilinganining 15 yilligiga bag‘ishlangan tantanali marosimda shunday
degan edi. Davlatimiz rahbarining taklifiga binoan 2008 yil Yoshlar
yili deb e’lon qilindi va “Yoshlar yili” Davlat dasturi qabul qilindi.
O‘tgan vaqt mobaynida ushbu Dastur ijrosini ta’minlash borasida misli ko‘rilmagan ishlar amalga oshirildi.
*Mustahkam huquqiy himoya – amalda
“Yoshlar
yili” Davlat dasturi doirasida, avvalambor, mustaqillik yillarida qabul
qilingan amaldagi qonun hujjatlarining yoshlar manfaatlari va
huquqlarini himoya qilishga oid qismi bugungi kunda olib borilayotgan
keng ko‘lamli islohotlar, yoshlarga oid davlat siyosatining asosiy
yo‘nalishlari va dasturlarining mazmun-mohiyatiga mosligi nuqtai
nazaridan tahlil qilib chiqildi. Bu borada yuzdan ortiq
normativ-huquqiy hujjat ro‘yxati tuzilib, qaysi qonun hujjatlari
takomillashtirishni taqozo etadi va yana qanday yangi huquqiy hujjatlar
qabul qilinishi lozimligiga jiddiy e’tibor qaratildi.
Joriy
yilning 8 yanvaridan e’tiboran “Bola huquqlarining kafolatlari
to‘g‘risida”gi qonun kuchga kirdi. Bola huquqlari sohasidagi
munosabatlarni huquqiy jihatdan tartibga solish mexanizmini
takomillashtirish yo‘li bilan bolalarni, shu jumladan, yetim bolalarni
va ota-ona qaramog‘idan mahrum bo‘lgan bolalarni ijtimoiy va huquqiy
himoya qilishning amaldagi tizimi samaradorligini oshirish mazkur
qonunning asosiy maqsadlaridandir.
Prezidentimiz tomonidan
shu yilning 16 aprelida yana bir muhim hujjat – “Voyaga yetmagan
shaxslarning huquqlarini himoya qilish to‘g‘risidagi qonun hujjatlari
takomillashtirilishi munosabati bilan O‘zbekiston Respublikasining
ayrim qonunlariga o‘zgartish va qo‘shimchalar kiritish haqida”gi qonun
imzolandi. E’tiborli jihati shundaki, bolalar o‘rtasidagi
jinoyatchilikning oldini olish samaradorligini oshirishga
yo‘naltirilgan mazkur qonun bilan amaldagi bir qancha qonun hujjatlari
takomillashtirildi.
Mamlakatimizda yoshlarga oid davlat
siyosati xalqaro huquqning umum e’tirof etilgan qoida-talablariga ham
asoslanadi. O‘zbekiston bevosita yoshlarning huquqlari va
erkinliklarini ta’minlashga qaratilgan o‘ttizdan ortiq xalqaro-huquqiy
hujjatning ishtirokchisidir. Jumladan, joriy yil 4 aprelda “Ishga qabul
qilish uchun eng kichik yosh to‘g‘risidagi konvensiyani (Jeneva, 1973
yil 26 iyun) ratifikatsiya qilish haqida”gi qonun, 8 aprelda esa
“Bolalar mehnatining og‘ir shakllarini taqiqlash va yo‘q qilishga doir
shoshilinch choralar to‘g‘risidagi konvensiyani (Jeneva, 1999 yil 17
iyun) ratifikatsiya qilish haqida”gi qonun kuchga kirdi.
Shu
tariqa mamlakatimizda yoshlar huquqlarini barcha sohalarda himoya
qilish maqsadida tegishli tashkiliy-huquqiy asoslar to‘la
shakllantirildi. Ayni chog‘da ushbu huquqiy asosni yanada
takomillashtirish ishlari davom ettirilmoqda. Qabul qilinayotgan barcha
qonunlar, normativ-huquqiy hujjatlarning zamirida yagona g‘oya
mujassam. Bu g‘oya, Prezidentimiz ta’biri bilan aytganda, sog‘lom
zurriyot, ya’ni jismoniy va ma’naviy yetuk avlod shakllanishi va o‘z
imkoniyatlarini hamda salohiyatini ro‘yobga chiqarishi uchun zarur
tizimni yaratish, yoshlarimizning huquq va manfaatlarini himoyalash,
zamonaviy bilim va kasbga ega bo‘lishini, jamiyatimiz hayotida munosib
o‘rin egallashini ta’minlashdan iborat.
Bugungi kunda
shuni ishonch bilan aytish mumkinki, bu boradagi milliy qonunchilik
tizimimiz xalqaro huquqning demokratik tamoyillariga mos kelishi bilan
birga, rivojlangan demokratik davlatlarning huquqni qo‘llash
amaliyotining ijobiy jihatlarini ham o‘zida mujassam etgan. Mazkur
demokratik standartlar yoshlarga oid davlat siyosatining asosini
tashkil etib, qonunchilik jarayonida va huquqni qo‘llash amaliyotida
keng tatbiq etilmoqda.
Davlat dasturi doirasida muddatli
harbiy xizmatni o‘tagan yoshlarni ishga joylashtirish bo‘yicha
statistika hisoboti tizimini joriy etish, bu borada mahalliy ijro
hokimiyati organlari rahbarlarining mas’uliyatini oshirishga doir
chora-tadbirlar ishlab chiqildi va amalga oshirilayotir.
2008
yil davomida yurtimizda ish haqi, pensiyalar, stipendiyalar va ijtimoiy
nafaqalar miqdori uch marta – 1 apreldan 12 foiz, 1 sentabrdan 20 foiz
va 16 noyabrdan 12 foizga oshirilganini alohida ta’kidlash darkor.
Jahon miqyosidagi iqtisodiy inqiroz eng rivojlangan davlatlar
iqtisodiyotiga ham salbiy ta’sir ko‘rsatayotgan bir sharoitda
Prezidentimiz tomonidan xalqimiz, shu jumladan, yoshlarimizning
daromadlari va turmush darajasini muttasil oshirib borish, ularga
ijtimoiy madadni yanada kuchaytirishga muntazam ravishda e’tibor
qaratib kelinmoqda.
Ta’lim olib, hunar o‘rganib…
Mustaqilligimiz
o‘n yettinchi yilining Yoshlar yili deb e’lon qilinishi zamirida chuqur
ma’no-mazmun mavjud. Zotan, O‘zbekiston – tom ma’noda yoshlar
mamlakati. Shu jihatdan, Yurtboshimiz ta’kidlaganidek, aholining
aksariyat qismini tashkil etadigan yoshlar muammolariga e’tiborni jalb
etish masalasi davlat va jamiyatning doimiy diqqat markazida turishi
shart.
Asosiy qonunimizning 37-moddasida har bir shaxsning
mehnat qilish, erkin kasb tanlash, adolatli mehnat sharoitlarida
ishlash va qonunda ko‘rsatilgan tartibda ishsizlikdan himoyalanish
huquqiga ega ekani qayd etilgan. Shuningdek, Konstitutsiyaning
41-moddasida: “Har kim bilim olish huquqiga ega. Bepul umumiy ta’lim
olish davlat tomonidan kafolatlanadi”, deb belgilangan.
Mustaqillikning
ilk kunlaridanoq davlatimiz rahbari tashabbusi bilan mamlakatimizda
insonning barcha huquq va erkinliklari, qonuniy manfaatlarini
ta’minlash, shu jumladan, yoshlarimizni jismonan va ma’nan barkamol
etib tarbiyalash borasidagi islohotlar hayotimizning boshqa sohalari
bilan o‘zaro chambarchas bog‘langan holda, tizimli va bosqichma-bosqich
ravishda amalga oshirilmoqda. Yoshlar yilida bu boradagi
sa’y-harakatlar yangi, yanada yuqori bosqichga ko‘tarildi. Yil boshidan
buyon 149 kasb-hunar kolleji, 22 akademik litsey, 634 umumta’lim
maktabi, bolalar sportini rivojlantirishning 184 obyekti ishga
tushirilgan.
Yangi ta’lim maskanlari zamonaviy mebel,
o‘quv-laboratoriya uskunalari bilan jihozlangan, ularda kompyuter
sinflari va lingafon xonalari tashkil etilgan. O‘quvchi va
talabalarning zamonaviy bilim olishini ta’minlash bilan birga, ularning
maishiy sharoitini yanada yaxshilash, sport bilan muntazam
shug‘ullanishi bo‘yicha aniq rejalar hayotga keng tatbiq etilmoqda.
“Ta’lim
to‘g‘risida”gi qonun, Kadrlar tayyorlash milliy dasturi, Maktab
ta’limini rivojlantirish Davlat umummilliy dasturining hayotimizga
chuqur tatbiq etilayotgani yoshlarimizga ta’lim-tarbiya berish,
kasb-hunar o‘rgatish, ularni ish bilan ta’minlash, sog‘ligini
asrab-avaylash, ma’naviyatini yuksaltirish, qobiliyati va iqtidorini
rivojlantirishda muhim omil bo‘lmoqda.
“Yoshlar yili”
Davlat dasturi ta’lim sohasidagi ana shu umummilliy davlat
dasturlarining so‘zsiz bajarilishini ta’minlashga yo‘naltirilgan.
Bolalarning umumiy o‘rta ta’lim, 9-sinf bitiruvchilarining esa o‘rta
maxsus, kasb-hunar ta’limi bilan qamrab olinishi, akademik litseylar va
kasb-hunar kollejlari bitiruvchilarining ishga joylashishi va oliy
ta’lim muassasalarida o‘qishni davom ettirishi, joylarda
mutaxassisliklar va hududlar bo‘yicha yoshlarning ish bilan bandligi
darajasini baholash, bu borada qat’iy statistika hisoboti va muntazam
monitoring olib borish kabi hozir izchil amalga oshirilayotgan
chora-tadbirlar shular jumlasidandir.
Joylarda yoshlar uchun
bo‘sh ish o‘rinlari mehnat yarmarkalari tashkil etilmoqda. Ayniqsa,
kasb-hunar kollejlari va akademik litseylarga qabul qilish tizimini
yanada takomillashtirish, o‘rta maxsus, kasb-hunar ta’limi tizimi
muassasalarini joriy yilda tugatgan bitiruvchilarni to‘liq ishga
joylashtirish, shuningdek, 2008-2009 o‘quv yili bitiruvchilari uchun
yangi ish joylari tashkil etishni ta’minlash bo‘yicha chora-tadbirlar
amalga oshirilmoqda.
Joriy yilning to‘qqiz oyida
mamlakatimizda 545,2 ming yangi ish o‘rni ochildi. Joylarda
ishbilarmonlik va xususiy tadbirkorlik, xizmatlar va servis,
kasanachilik sohalarini rivojlantirish evaziga tashkil etilgan ana shu
ish o‘rinlarining katta qismini yoshlar band etayotgani quvonarlidir.
Mamlakatimiz
ta’lim muassasalarini oliy ma’lumotli malakali o‘qituvchilar va
muhandis-pedagog kadrlar bilan ta’minlash bo‘yicha bir qator ishlar
qilindi. Xususan, kasb-hunar kollejlari o‘qituvchilarining mehnatiga
haq to‘lash tizimini yanada takomillashtirish va ta’lim-tarbiya ishlari
darajasi hamda sifatini oshirishda ularni moddiy rag‘batlantirishning
samarali mexanizmi joriy etila boshlangani muhim qadam bo‘ldi.
Prezidentimizning
2008 yil 24 iyulda qabul qilingan qaroriga muvofiq, joriy yilning 1
sentabridan boshlab oliy ta’lim muassasalari professor-o‘qituvchilar
tarkibi va rahbar xodimlarining lavozim maoshlari o‘rtacha 25 foiz
oshirildi. Bu, shubhasiz, mamlakatimiz ta’lim maskanlarida talabalarga
tahsil berayotgan insonlar mehnatining munosib e’tirofidir.
Tabiiyki,
bularning barchasi ta’lim-tarbiya tizimidagi islohotlar muvaffaqiyatli
amalga oshirilayotgani va hayotimizda yangi ta’lim modelining kuchli
samarasiga erishayotganimizning o‘ziga xos dalolatidir. Eng muhimi, o‘z
Vatanining taqdiri, buguni va kelajagi uchun mas’uliyatni chuqur his
etadigan, mustaqil va yangicha fikrlaydigan kadrlar tayyorlash yo‘lida
amalga oshirilgan zalvorli ishlar o‘z samaralarini bermoqda.
Bugun
yangicha fikrlaydigan, o‘z kelajagini jamiyatda demokratik
qadriyatlarni mustahkamlash bilan, mamlakatimizning kelajagini jahon
hamjamiyatiga integratsiyalashuvi bilan bog‘liq holda ko‘radigan yangi
avlod vakillari hayotga dadil kirib kelmoqda.
Yoshlarimiz
siymosida muayyan kasb, ba’zan bir necha kasb mutaxassisi sifatida
diplom olgan, bir necha xorijiy tilni o‘rgangan, zamonaviy texnika va
texnologiyalarni puxta o‘zlashtirgan, mustaqil inson sifatida
shakllangan, bir so‘z bilan aytganda, el-yurt xizmatiga shay, yuragi
yonib, ko‘zlaridan o‘t chaqnab turgan navqiron kadrlarni ko‘rib,
qalbingizda ishonch, g‘urur-iftixor tuyg‘ulari jo‘sh uradi.
Iste’dodlarga qanot bag‘ishlab
El-yurtimiz
o‘zining iste’dodli farzandlari bilan, ularning xalqaro fan
olimpiadalari, jahon sport maydonlari, madaniyat va san’at olamida
erishayotgan katta yutuqlari bilan haqli ravishda faxrlanadi.
Yurtimizda yashayotgan har bir bolaning o‘ziga xos qobiliyati va
iste’dodini o‘z vaqtida payqash, tarbiyalash va ro‘yobga chiqarish
Yoshlar yilida nafaqat ota-onalarning ezgu maqsadi, balki
jamiyatimizning burchiga aylandi.
“Yoshlar yili” Davlat
dasturida bu borada belgilangan chora-tadbirlarni amalga oshirishda
davlat tashkilotlari bilan bir qatorda “Kamolot” yoshlar ijtimoiy
harakati, “Kelajak ovozi” yoshlar tashabbuslari markazi, “O‘zbekiston
madaniyati va san’ati forumi”, “Sen yolg’iz emassan”, Ijtimoiy
tashabbuslarni qo‘llab-quvvatlash, “Iste’dod” jamg‘armalari, Respublika
bolalar ijtimoiy moslashuvi markazi, “Hayot” kabi nodavlat notijorat
tashkilotlarining ishtirok etayotgani katta ahamiyatga ega.
“Kelajak
ovozi”, “Yangi avlod”, “Yilning eng yaxshi o‘qituvchisi” kabi
respublika tanlovlarining yuqori saviyada tashkil etilayotgani
yoshlarda chuqur bilim olishga intilishni kuchaytirish, ilg‘or
o‘qituvchilar mehnatini rag‘batlantirish, pedagoglar o‘rtasida
innovatsiya texnologiyalarini joriy etish bo‘yicha raqobat muhitini
shakllantirishda muhim omil bo‘lmoqda.
“Kamolot” yoshlar
ijtimoiy harakati tashabbusi bilan joylarda “Yosh oila” markazlari
tashkil qilindi. “Kelajak ovozi” yoshlar tashabbuslari markazi
sa’y-harakatlari tufayli shahar va qishloqlarimizda Yoshlar bog‘i barpo
etildi. Baxt uylari, sport inshootlari, basseynlar, madaniyat va san’at
koshonalari qad rostlamoqda.
Kezi kelganda, hozirgi
yoshlar axborot-kommunikatsiya texnologiyalaridan, Internetning beqiyos
imkoniyatlaridan keng foydalanadigan, dunyoning istalgan chekkasi bilan
tezda bog‘lanib, oson muloqotga kirisha oladigan, qisqacha aytganda,
jahon miqyosida voqealar shiddat bilan kechayotgan bugungi davrimizga
xos va mos farzandlar ekaniga e’tiborni qaratish o‘rinlidir.
Farzandlarimizning
zamon va texnikaviy taraqqiyot bilan baravar odimlayotgani qalbimizga
g‘urur bag‘ishlasa, ularning ongu tafakkurini dunyoda kuchayib
borayotgan turli ma’naviy tahdidlardan, “ommaviy madaniyat”ning zararli
ta’siridan himoya qilish mas’uliyati bizni yanada hushyor, sezgir va
ogoh bo‘lishga undaydi. “Yoshlar yili” Davlat dasturida belgilangan
chora-tadbirlarni amalga oshirish jarayonida, tabiiyki, ana shu
jihatlar ham nazardan chetda qolayotgani yo‘q.
Yurtimizda
iqtidorli yoshlarni moddiy rag‘batlantirish va ma’naviy
qo‘llab-quvvatlashning samarali tizimi amal qilmoqda. Oliy o‘quv
yurtlarida bakalavr, magistr va aspirantlar uchun davlat
stipendiyalarining turli shakllari joriy etilgan. Ularning eng yuqorisi
O‘zbekiston Respublikasi Prezidenti stipendiyasidir. Ushbu stipendiya
11 yo‘nalish bo‘yicha bakalavrlar va magistrlarga hamda 5 yo‘nalish
bo‘yicha aspirantlarga beriladi. Bakalavrlar uchun muayyan yo‘nalishlar
bo‘yicha Alisher Navoiy, Ulug‘bek, Beruniy, Ibn Sino nomidagi davlat
stipendiyalari ham ta’sis etilgan.
Shuningdek, akademik
litseylar, kasb-hunar kollejlari va umumta’lim maktablari o‘quvchilari
o‘rtasida respublika olimpiadalari, tanlovlar, sport musobaqalari
o‘tkazish, ana shu tadbirlarda va xalqaro miqyosdagi olimpiada, tanlov
va musobaqalarda g‘oliblikni qo‘lga kiritgan yosh ishtirokchilarni
moddiy rag‘batlantirish yaxshi yo‘lga qo‘yilgan. Buning uchun zarur
barcha mablag‘larning Davlat budjetidan ajratilishi ham davlatimizning
yoshlar taqdiri va istiqboliga nechog‘li ulkan mas’uliyat bilan
yondashishini ko‘rsatib turibdi.
Xalqimiz o‘zining yuksak
musiqiy salohiyati, musiqa san’atiga ulkan muhabbati bilan azaldan
jahon ahlining e’tirofini qozongan. Mustaqillik yillarida zamonaviy
o‘zbek san’ati dunyo miqyosida yanada ulkan obro‘ va e’tibor topmoqda.
Bunda iqtidorli yoshlarning xizmati salmoqlidir. Iste’dodlarning yuksak
parvozida ijodkor yoshlarni qo‘llab-quvvatlash mamlakatimizda davlat
siyosatiga aylangani muhim ahamiyat kasb etmoqda. Zero, mehr va
e’tibor, parvarish bo‘lmasa, o‘sish-ulg‘ayish, kamolot va taraqqiyot
bo‘lmaydi.
O‘zbekistonda musiqa, tasviriy, monumental va
amaliy san’at sohalarida katta muvaffaqiyatlarga erishilgani tasodifiy
emas. Milliy raqs va xoreografiya san’atini rivojlantirishga ham
e’tibor kuchaydi. Bu san’at turlari chet elda keng e’tirof etilgan.
Milliy va jahon madaniyatining eng yaxshi namunalarini keng targ‘ib
qilish va ommalashtirish yosh avlodni ma’naviy tarbiyalashga xizmat
qiladi.
Keyingi yillarda davlat idoralari bilan tegishli
nodavlat tashkilotlar hamkorligi natijasida yurtimizda o‘tkazilayotgan
“Nihol” va Zulfiya mukofoti tanlovlari, “Yangi avlod” va “Kelajak
ovozi” ko‘rik-tanlovlari ming-minglab yosh iste’dod egalarini kashf
etmoqda. “Yoshlar yili” Davlat dasturi ijrosi doirasida ham o‘zaro
hamkorlikda nainki mamlakatimiz doirasida, balki xalqaro miqyosda muhim
ahamiyat kasb etgan tanlovlar, festivallar, forumlar va anjumanlar
tashkil etildi. Toshkent shahrida o‘tkazilgan kimyo fani bo‘yicha
42-xalqaro Mendeleyev olimpiadasi bunga yaqqol misol bo‘la oladi.
Bularning
barchasi mamlakatimizda iqtidorli yoshlarni har tomonlama
qo‘llab-quvvatlash borasidagi ishlar ko‘lami tobora kengayib
borayotganidan dalolatdir.
Oila – ma’naviyat qo‘rg‘oni
Prezidentimiz
o‘zining “Yuksak ma’naviyat – yengilmas kuch” asarida “Yoshlarimizni
har tomonlama sog‘lom va barkamol etib tarbiyalash, hayot abadiyligi,
avlodlar davomiyligini ta’minlaydigan ma’naviyat qo‘rg‘oni bo‘lmish
oilani mustahkamlash bugungi kunda barchamizning nainki asosiy
vazifamiz, balki insoniy burchimizga aylanishini istardim”, deb
ta’kidlaydi. Davlatimiz rahbarining ta’biri bilan aytganda, bu yorug‘
dunyoda hayot bor ekan, oila bor. Oila bor ekan, farzand deb atalmish
bebaho ne’mat bor. Farzand bor ekan, odamzot hamisha ezgu orzu va
intilishlar bilan yashaydi.
Mamlakatimizda yoshlarimizga
oila qurish naqadar muhim va mas’uliyatli ekanini anglatish, sog‘lom
oilani shakllantirish va oilada yuksak ma’naviy-axloqiy muhitni qaror
toptirish uchun zarur shart-sharoit yaratish, yoshlarni oila qurishga
tayyorlash, oilalar mustahkamligini va manfaatlarini ta’minlash,
sog‘lom farzand o‘stirish, tarbiyalash va voyaga yetkazish masalasi
davlat siyosati darajasiga ko‘tarilgan.
Bunda, avvalambor,
oilaning muqaddasligi hamda nikoh mas’uliyati bo‘yicha kelajakda er va
xotin bo‘layotgan yoshlarning tafakkurini, ongini o‘zgartirishga
alohida e’tibor qaratilmoqda. Oila qurish masalasi har bir inson
hayotida ulkan hodisa ekanligi, bu masala shaxsiy, xususiy doiradan
chiqib, ijtimoiy ahamiyat kasb etishi haqida jamoatchilik orasida
targ‘ibot-tushuntirish ishlari olib borilmoqda. Qizlarimiz ongida
onalik, o‘g‘illarimizda esa ota bo‘lish mas’uliyatini shakllantirish,
bunga ularni tayyorlash, yosh oilalarning huquqiy savodxonligini tubdan
yaxshilash va oilada bolaning huquqlari va qonuniy manfaatlarini himoya
qilishga qaratilgan tadbirlar ko‘lami kengaymoqda.
Yosh oila
farovonligi milliy farovonligimiz asosidir. Yosh oila sog‘lom va
mustahkam bo‘lsa, mahallada tinchlik va hamjihatlikka erishiladi.
Prezidentimiz uqtirganidek, sog‘lom oila vujudga kelishi uchun, avvalo,
jamiyat va davlat qayg‘urishi, shunga zamin yaratib berishi lozim.
Shundagina mustahkam oila dunyoga keladi. Oila sog‘lom bo‘lsa, jamiyat
sog‘lom, mamlakat qudratli, yurt tinch-osoyishta, xalq esa boy bo‘ladi.
O‘z
uyim – o‘lan to‘shagim. Xalqimizning ushbu purma’no naqlini so‘zma-so‘z
sharhlaydigan bo‘lsak, birovning uyida yumshoq o‘rindiqda o‘tirgandan
ko‘ra, tap-taqir o‘lan to‘shakda, ya’ni bo‘yrada o‘tirsang ham, o‘z
uying, oilang davrasi yaxshi, degan mazmun chiqadi. Zotan, har bir
o‘zbek, o‘zbekistonlik uchun Vatan – muqaddas sajdagoh bo‘lsa, o‘z uyi,
yashash maskani – Vatan ichra mo‘jaz Vatandir.
Shu
ma’noda, yosh oilalar uchun uylar bunyod etilishi “Yoshlar yili” Davlat
dasturi ijrosi doirasida amalga oshirilayotgan chora-tadbirlar orasida
eng ahamiyatli, alohida tahsinga sazovor xayrli ishlardan bo‘ldi.
Mamlakatimizning turli hududlarida har biri 32 xonadonli 67 uy
qurilayotgani nazarda tutilsa, bu bunyodkorlik ishlari yosh oilalarni
uy-joy bilan ta’minlashga ko‘maklashishda, ularning moddiy va ijtimoiy
farovonligini oshirishda nechog‘li katta ahamiyatga ega ekanini anglash
qiyin emas.
Natijada, bir tomondan, minglab yosh oilalar
uyli-joyli bo‘lib hayotga ishtiyoqi, kelajakka ishonchi yanada
ortayotgan bo‘lsa, ikkinchi tomondan, turmush ostonasiga yaqinda qadam
qo‘ygan yoshlarning ota-onalari, qarindosh-urug‘lari, yaqinlari,
mahalla-ko‘y orasida davlatimizning oqilona siyosatiga nisbatan
hurmat-e’tibor tobora kuchaymoqda.
Bu borada
erishilayotgan yutuqlar Prezidentimizning 2007 yil 18 mayda qabul
qilingan “Yosh oilalarni moddiy va ma’naviy qo‘llab-quvvatlashga doir
qo‘shimcha chora-tadbirlar to‘g‘risida”gi farmoni ijrosi bo‘yicha yosh
avlodni, xususan, yosh oilalarni moddiy va ma’naviy
qo‘llab-quvvatlashni yanada kuchaytirishga yo‘naltirilgan ezgu
ishlarning izchil davomidir.
Mazkur farmonga muvofiq, yosh
oilalarni uy-joy sotib olish yoki qurish, uy xo‘jaligini yo‘lga
qo‘yishda har tomonlama qo‘llab-quvvatlash maqsadida tijorat banklari
tomonidan imtiyozli shartlar asosida yosh oilalarga ipoteka, iste’mol
kreditlari va mikrokreditlar ham ajratilayotir. Ahamiyatli tomoni
shundaki, bunday kreditlar evaziga yoshlarning mustaqil hayotga dadil
qadam qo‘yishi, mustaqil mehnat faoliyatini boshlashi, barqaror daromad
manbaiga ega bo‘lishi, uy-joy va maishiy sharoitini yaxshilab olishi
uchun amaliy rag‘bat omillari poydevori mustahkamlanmoqda.
Ayni
paytda mamlakatimizning barcha hududlarida fuqarolar yig‘inlari
raislari (oqsoqollari) va ularning maslahatchilari saylovi boshlandi.
Shuni ta’kidlash joizki, mahallalar oqsoqollari va maslahatchilarining
boshqa ko‘plab yo‘nalishlar qatori sog‘lom oilani shakllantirish, ko‘p
bolali oilalarga ijtimoiy yordam ko‘rsatish, yoshlarni turmushga
tayyorlash borasida tutgan o‘rni va ahamiyati beqiyosdir.
Prezidentimizning
joriy yil 18 iyunida qabul qilingan “Bolalikdan nogironlar
tug‘ilishining oldini olish uchun tug‘ma va irsiy kasalliklarni barvaqt
aniqlash davlat dasturi to‘g‘risida”gi qarori yoshlarni oilaviy hayotga
tayyorlash, irsiy kasalliklar kelib chiqishining oldini olish,
tibbiy-ijtimoiy ko‘makka muhtoj bolalarning salomatligini muhofaza
qilish bilan bog‘liq keng ko‘lamli vazifalarni hayotga tatbiq etishda
dasturilamal bo‘lib xizmat qilayotganini alohida ta’kidlash joiz.
Yurtimizda
950 mingdan ziyod yosh oila mavjud. O‘tgan davrda, bir tomondan, ana
shu yosh oilalar manfaatlarini ta’minlash davlat siyosatining uzviy
qismiga aylandi va uni amalga oshirishning zarur bo‘lgan huquqiy
asoslari yaratildi, ikkinchi tomondan, yosh oilalarni moddiy
qo‘llab-quvvatlash tizimi shakllandi, uchinchi tomondan esa, yosh
oilalarning huquq va manfaatlarini himoya qilish, ularning huquqiy ongi
va madaniyatini yanada yuksaltirish yo‘lida ko‘rilayotgan kompleks
chora-tadbirlar o‘z samaralarini bermoqda.
Navqiron
avlodga yuksak ishonch, e’tibor va g‘amxo‘rlikdan bahra olayotgan yosh
oilalar o‘zlari qurgan yangi ro‘zg‘or uchun g‘urur va mas’uliyat
hissini yanada teran anglashga, ota-onalari, keksa avlod vakillariga
hurmat-ehtirom ko‘rsatishga, o‘z farzandlarini xalqimizning boqiy
ma’naviy qadriyatlari ruhida tarbiyalashga intilib yashamoqda.
…Xalqimiz
17 yil muqaddam dunyoda hech kimga qaram bo‘lmasdan, erkin va ozod,
farovon hayot quramiz, deb azmu qaror qilgan edi. Prezident Islom
Karimov ta’kidlaganidek, oldimizda turgan ulkan marralarni egallashning
eng asosiy mezoni – bu xalqimizning baquvvat iymon-e’tiqodi, tobora
yuksalib borayotgan ongu tafakkuri, hayotga, mehnatga, mulkka
munosabati tubdan o‘zgarayotgani, o‘z fuqarolik burchini chuqur anglab,
Vatanga muhabbat va sadoqat, daxldorlik tuyg‘usi bilan yashayotganida
namoyon bo‘lmoqda.
Ayniqsa, bugungi va ertangi kunimizning
hal qiluvchi kuchi sifatida maydonga chiqayotgan, milliy va umuminsoniy
qadriyatlar uyg‘unligi asosida tarbiya olayotgan, jismoniy va ma’naviy
sog‘lom, barkamol yosh avlodimiz timsolida bu haqiqat yana bir bor o‘z
tasdig‘ini topmoqda. |