O‘zbekiston Respublikasi Oliy Majlisi Senati Kengashining 2008 yil
30 sentabrda qabul qilingan “Fuqarolar yig‘inlari raislari
(oqsoqollari) va ularning maslahatchilari saylovi to‘g‘risida”gi
qaroriga muvofiq joylarda ushbu muhim siyosiy tadbir ko‘tarinki ruhda
o‘tmoqda.
Namangan viloyati Kosonsoy tumanidagi “Mahdumi
A’zam” mahallasi ahli jamiyat hayotida faol ishtirok etib,
mamlakatimizda amalga oshirilayotgan keng qamrovli islohotlarga munosib
hissa qo‘shib kelmoqda.
Mahallada obodonlashtirish va
bunyodkorlik ishlariga alohida e’tibor qaratilmoqda. Zamonaviy savdo va
maishiy xizmat ko‘rsatish majmui, yangi tibbiyot maskani aholi
xizmatida. Yaqinda ish boshlagan tikuvchilik sexida yigirma nafardan
ziyod xotin-qiz ish bilan ta’minlandi.
– Saylov jarayonida
mamlakatimizda demokratik jamiyat poydevori tobora mustahkamlanib
borayotganining guvohi bo‘ldik, – deydi mehnat faxriysi A.Umarov. –
Yig‘in raisi ham, maslahatchilar ham mahalla ahli ishonch bildirgan
vakillar tomonidan oshkoralik asosida saylandi. |