Harbiylarga bayram sovg‘asi
O‘zA, Yorqul Umar, 16.01.2009 09:22
Mamlakatimizda Vatan himoyachilari bayrami keng nishonlanayotgan shu kunlarda Navoiy viloyati hududida harbiy xizmatni o‘tayotgan bir guruh harbiylarga yangi uy kalitlari topshirildi.
Mamlakatimizda harbiy xizmatning nufuzi tobora oshib bormoqda. Zamonaviy, professional armiyaning shakllangani, el-yurt osoyishtaligi yo‘lida kamarbasta bo‘layotgan harbiy xizmatchilarni ijtimoiy qo‘llab-quvvatlash ko‘lami kengayib borayotgani buning muhim omillaridandir.
Navoiy shahridagi “Farhod” madaniyat saroyida o‘tgan tadbirda shu haqda so‘z yuritildi. Yangi uyga ega bo‘lgan harbiylar davlatimiz rahbari rahnamoligida ko‘rsatilayotgan e’tibor va g‘amxo‘rlikdan behad mamnun ekanliklarini ta’kidladilar. Viloyat badiiy jamoalari ishtirokida konsert dasturi tadbirga yanada ko‘tarinkilik baxsh etdi.
– Oila a’zolarim va yaqinlarimning quvonchi cheksiz, – deydi kichik serjant Anvar Jumayev. – Barcha qulayliklarga ega yangi uyli bo‘ldik. Bunday e’tibor biz, harbiylarning kuchimizga kuch, g‘ayratimizga g‘ayrat qo‘shadi. |